Хөрмәтле дуслар! Татнетны үстерү фонды бүгеннән үзенең татар интернеты үсешен анализлау эшләрен янә торгызып җибәрә. Без бүген (25 нче апрельдә) актуаль булган LiveInternet статистикасын алдык һәм аны 2018 елгы статистика белән чагыштырдык.

Нәтиҗәләр бик кызыклы. LiveInternet'ның TOP-250 исемлегенә 2018 елда 22 татар сайты гына кергән булса, быел андый популяр татар сайтларының саны 34 кә җиткән (диаграммада бирелгән)!  Ә ике телдә (татар һәм рус телләрендә) эшли торган сайтларның саны 54 тән 80 гә кадәр арткан! Димәк, шушы 2 ел эчендә яңа файдалы татар сайтлары булдырылган һәм алар үз кулланучыларын тапкан, дигән сүз. Әгәр министрлыкларның һәм башка күп кенә татар сайтларының LiveInternet счетчигы булса, әлеге исемлек әле тагын дистәләгән сайт белән тулыланыр иде.

Хәзер татар сайтларының рус телендәге сайтлар белән чагыштырмасын карыйк. Сыйфатлы татар сайтлары 21,6% тан (54/250) 32% ка (80/250) кадәр күтәрелгән. Әгәр моннан ике ел элек һәр бишенче сайт файдалы татарча контентка ия булса, быел һәр өченче сайтта файдалы татарча контент бар, дигән сүз бит бу!!!

Бүгенге анализ татарча сайтлар саны артуын гына түгел, аларның кулланучылар саны да артуын күрсәтә. Интертат сайтын моннан 2 ел элек аена 38318 тапкыр кереп укучы булса, хәзер сайтка кереп яңалыклар һәм мәкаләләр укучыларның саны (78808 мәртәбә) бермә-бер арткан! Татмедиа сайтына кереп татарча һәм русча мәгълүмат укучылар саны тиздән 1,5 млн.нан артачак! Ә Шәһри Казан газетасын онлайн укучылар саны шушы 2 ел дәверендә 3 мәртәбә, ә Татар-Информның татар версиясен укучылар 4 мәртәбә арткан! Гомумән, татар интернетын үстерүдә Татмедиа агентлыгының зур хезмәте күренә, аларга "Афәрин!" дип кенә әйтәсе килә! Татнетны үстерү фонды яңалыклары белән кызыксынучылар санының да 10 мәртәбә артуы безне куандырды.

Әлбәттә, әлеге статистика тулы түгел. Монда әле бик күп кенә татар сайтларын өстәргә булыр иде. Безнең статистикага эләгү өчен аларга да LiveInternet счетчигын кулланулары - сайтларына урнаштырулары кирәк. Бирелгән таблицада сайтны гомуми кулланучылар саны түгел, ә Татарстан территориясендә кулланучылар саны гына бирелгән. Чынбарлыкта сайтларны кулланучылар саны тагын да зуррак. Мисал өчен, Белем.ру порталына соңгы айда кергән 6925 кулланучы ул аның барлык кулланучылары санының 69%-ын гына тәшкил итә. Димәк, файдалы татар мәгарифе яңалыклары һәм ресурслары белән аена 10 меңгә якын кеше кызыксына, дигән сүз.

Татар интернеты якын киләчәктә тагын да ныгыр, аның кулланучылары саны тагын да артыр, алар арасыннан яңа сайт авторлары да калкып чыгар, алар яхшыдан-яхшы яңа татар интернет-проектларына нигез салырлар, дип уйлыйм!

Татар сайтларына ешрак керергә тәкъдим итәбез, кулланучылары саны арта барган саен әлеге интернет-проектларның авторлары тагын да канатланыбрак эшләрләр, интернет-проектлар яңа татарча рубрикалар, функцияләр белән тулыланыр, дип көтеп калабыз.

Аналитиканы Татнетны үстерү фонды директоры Р.М. Гатауллин ясады.