Быел август аенда Татнетны үстерү фонды "Белем җәүһәрләре" интернет-проектлар бәйгесенең оештыручы партнёрлары составына керде.
"Белем җәүһәрләре" дөньякүләм интернет-проектлар бәйгесе 2010 нчы елдан башлап ел саен үткәрелеп килә. Быел әлеге бәйге дүртенче мәртәбә "Белем җәүһәрләрен" ачыклый.
Бәйгенең төп оештыручысы - "Белем.ру" оешмасы. Бүгенге көндә бәйге Татарстан Республикасы Мәгариф һәм фән министрлыгы, Татарстан Республикасы Мәдәният министрлыгы белән берлектә оештырылып алып барыла.
Бәйгенең максатлары һәм бурычлары:
- интернет челтәрендә җәүһәр дип саналырлык татар телендә ясалган кыйммәтле белем чыганакларын эзләп табу һәм аларны популярлаштыру;
- Татарстан Республикасында һәм аннан читтә яшәүче татарлар өчен файдалы интернет-ресурсларны бер урынга туплау;
- фән, мәгариф һәм мәдәният өлкәсендәге татар телле интернет-ресурсларның сыйфатын һәм рейтингын үстерүдә ярдәм күрсәтү;
- интернет челтәрендә фән, мәгариф һәм мәдәният өлкәсендәге чыганакларны булдыру өстендә эшләүче белгечләрне таныту, аларның бергәлеген булдыру.
Бәйге турында тулырак мәгълүматны аның рәсми сайтыннан алырга мөмкин: http://konkurs.belem.ru.