Әдәби марафон (#әдәбимарафон)

Россиякүләм (2019 елдан башлап - дөньякүләм) "Әдәби марафон" (#әдәбимарафон) бәйгесе - ВКонтакте социаль челтәре кысаларында 2017 елдан башлап даими үткәрелә торган онлайн-проект.

Проектның максаты - яхшы гадәт - татарча әдәби әсәрләр, китаплар һәм журналлар уку гадәтен формалаштыру. Гадәт якынча 21 көн дәвамында формалаша дигән фикер бар. Проект кысаларында көн саен татарча әдәби әсәр укырга һәм укыган әсәрдән иң кызыклы һәм файдалы өзек(ләр)не ВКонтакте социаль челтәрендә үз сәхифәңдә башкаларны да кызыктырырлык итеп, фотосурәтләр һ.б. төр медиафайллар өстәп #әдәбимарафон, #татнетныүстерүфонды һәм #татарстанкитапнәшрияты хэштеглары белән урнаштырырга кирәк. Шулай ук, бу хэштегларга өстәп китап авторын, китап яисә журнал исемен үз эченә алган башка татарча хэштегларны да кулланырга киңәш ителә (мәсәлән, #ХәсәнТуфан #кайсыгызныңкулыҗылы).

Проект Татнетны үстерү фонды һәм Татарстан китап нәшрияты белән бергә оештырылып үткәрелә. Бәйгенең ешлыгы - квартал саен. Марафон 1 нче гыйнвар, 1 нче апрель, 16 нчы июль (мәктәп укучылары өчен генә), 1 нче октябрь көннәрне башланып китә һәм 21 көн дәвамында бара, марафоннарда татарча яза һәм укый алган һәркем катнаша ала.

Бәйгенең финалына 21 көн дәвамында онлайн-марафонда катнашкан кулланучылар чакырулы. Финал тантанасында, дипломнар һәм бүләкләр тапшыру белән беррәттән, танылган татар язучылары һәм шагыйрьләр белән очрашу үткәрелә, Татарстан китап нәшриятында яңа нәшер ителгән китаплар белән таныштыру оештырыла.

Проектта катнашу өчен марафон башланыр алдыннан рәсми берләшмәдәге (https://vk.com/adabimarathon) беркетеп урнаштырылган игълан-яңалыкка комментарий буларак "+" тамгасы куеп катнашырга теләк белдерергә кирәк. Шулай ук, марафончылар өчен аерым чат оештырылачак, чатка эләгү өчен проектның идея авторы Рал Гатауллин (https://vk.com/belem) белән ВКонтакте социаль челтәрендә дус булуыгыз сорала. Үзендә яхшы гадәт тәрбияләргә теләк белдергән әлеге кулланучылар марафонның икенче көнендә махсус ясалган әлеге марафон чатына өстәләчәкләр, шул рәвешле китап укучылар өчен үзара аралашу, фикер алышу мәйданчыгы булдырылачак.

Марафон барышында урнаштырылган татарча әдәби әсәрләрдән өзекләр белән ВКонтакте челтәрендә #әдәбимарафон хэштегы буенча күчеп танышырга мөмкин. Әдәби марафон (#әдәбимарафон) проекты, аның кагыйдәләре турында актуаль мәгълүмат Татнетны үстерү фондының рәсми сайтында http://tat-i.net/tt/adabimarafon адресы буенча урнаштырылган.

ИГЪТИБАР! 2019 елның 1 нче гыйнварыннан "Әдәби марафон" (#әдәбимарафон) бәйгесе дөньякүләм бәйге статусын ала, әлеге проектта катнашу өчен чикләүләр юк.

Фикерләр

Аватар пользователя Розали
+Розалия Рамазанова,Татарстан,Арча шәһәре
Аватар пользователя Кадрия Вэсим кызы
кызганыч, бу марафонга 1 гыйнвардан ук кушыла алмадым. ә татар әдәбиятын , гомумән татарча укырга үлепләр яратам.

© "Татнетны үстерү фонды" коммерцияле булмаган оешмасы, 2013-2019. Барлык хокуклар якланган

Адрес: 420021 Казан шәһәре, Габдулла Тукай урамы, 84А
Телефон: +79656006453, +79600456353